کیپٹن (ر) صفدر کا امجد شاہ سے ذاتی تنازع ہے، اسے سیاست کا حصہ نہ بنائیں: اعظم نذیر تارڑ

وفاقی وزیر قانون اعظم نذیر تارڑ نے کہا ہے کہ کیپٹن (ر) صفدر کا سپریم کورٹ بار کے انڈیپنڈنٹ گروپ کے صدارتی امیدوار امجد شاہ سے ذاتی تنازع ہے، جسے سیاست کا حصہ نہیں بنانا چاہیے۔
جیو نیوز سے گفتگو کرتے ہوئے اعظم نذیر تارڑ نے کہا کہ مسلم لیگ (ن) لائرز فورم امجد شاہ کی حمایت کا اعلان کرچکا ہے۔ ان کا کہنا تھا کہ کیپٹن (ر) صفدر محترم ہیں، تاہم وہ وکیل یا بار کے رکن نہیں، اس لیے انہیں بار انتخابات اور اس کے معاملات سے دور رہنا چاہیے۔
وزیر قانون نے احسن بھون کے حوالے سے بھی گفتگو کرتے ہوئے کہا کہ وہ وکلا برادری میں قابل احترام شخصیت ہیں اور گزشتہ 10 برس کے دوران ان کے گروپ نے ایک یا دو مرتبہ ہی الیکشن میں شکست کھائی ہے۔
اعظم نذیر تارڑ نے کہا کہ بار انتخابات کے دوران بعض معاملات کو متنازع بنانا مناسب نہیں، جبکہ ان کے مطابق بار کے انتخابی اور انتظامی معاملات کے لیے باقاعدہ نظام موجود ہے۔
انہوں نے مزید کہا کہ کیپٹن (ر) صفدر کا بار انتخابات سے کوئی تعلق نہیں۔